TBC/TB atawa Tuberkulosis, saboh peunyakét nyang meusabab nibak kumeun bakteri nyang geupeunan Mycobacterium tuberculosis. Seunipat kumeun nyoe halôh that hana leumah takalön ngön mata. Peunyakét TB nyoe jiék bak sidroe-droe ureueng röt udara. Meunyö ureueng nyang teungöh sakét nyan batôk atawa beureusén, kumeun lam ie babah atawa geuneuh’euk ureueng nyan jiba lé angèn sampoe jitamöng röt naph’ah ureueng nyang sihat.
Geujala
Geujala nyang paléng peunténg nibak peunyakét nyoe nakeuh batôk meugeuneuheuk leubèh nibak 2 go jumeu’at. Geujala batôk nyoe jeuet na darah atawa hana. Meunyo sidroe-droe ureueng na batôk leubèh nibak 2 go jumeu’at, peureulèe that keu geuparéksa geuneuh’euk nyan bak laboratorium. Silaén nibak batôk, na padum-padum boh geujala laén nyakni:
– Brat badan jitren lam padum buleuen u likôt
– Seuuem asoe
– Meureuôh ‘oh watèe malam
– Sakét bak dada
– Leumoh
– H’an löt bu
Ubat
Sakét TB nyoe brat bak geupeuubat sabab kumeun TB nyan hana saban lagèe kumeun-kumeun nyang laén. Miseue kumeun peunyakét laén jeuet tajép ubat keu 3 uroe atawa sigo jumeu’at sagai ka puléh. Tapi kumeun TB nyoe h’an meuhasé ngon tajép ubat 3 uroe sagai. Ubat sakét TB nyoe peureulèe tajép trôk ‘an 6 buleuen atawa leubèh, meunurôt brat sakét.